زبان حال حضرت علی (ع) بر سر بالین حضرت زهرا (س) از مرحوم عابد « هيئت زنجیر زنان محله نوبر
شما اینجا هستید:صفحه اصلی » اشعار استادعابد. » زبان حال حضرت علی (ع) بر سر بالین حضرت زهرا (س) از مرحوم عابد

زبان حال حضرت علی (ع) بر سر بالین حضرت زهرا (س) از مرحوم عابد

کنار ایت مردمکدن سایه ی مژگانی یازهرا

گوزومده روشن ایله نیّر تابانی یازهرا

 

زجاج چشمون آیات الهی جلوه سین آلموش

گوز آچ گورسون گوزوم بو صفحه ده قرآنی یازهرا

پیمبر گوزلرین ایلر تداعی گردش چشمون

گوز آچ ایله محقّق گوزده بو عنوانی یازهرا

فروغ لایزالیدن منوّر گوزلره نولموش

که نشر ایتمور نظرده پرتو عرفانی یازهرا

فلق نورین سحاب تیره گویا ایلیوب پنهان

که روشن ایلمور نور سحر دنیانی یازهرا

مگر ابر سیاه ایچره یمانی نجم اولوب آفل

خسوفه یا سالوب گردون مه تابانی یازهرا

شبستان فصیلت شمعی تا نورین نهان ایلوب

گورور ظلمت سرا گوز عالم امکانی یازهرا

گلستان کرامت عبهری تا نظره دن قالموش

ایدوب پژمرده محنت سوسن و مینانی یازهرا

گوز آچ بیرده گوره بلکه گوزوم موج نگاهوندا

صفای جان فزای طلعت جانانی یازهرا

بو ناهنگام یاتماق ایلوری تشویشیمی افزون

ایدور تلقین خیاله اوزگه بیر معنانی یازهرا

غم هجرانیدن ایلور حکایت حالون اوّلده

دیر قلبیم ندور بو اوّلین پایانی یازهرا

تمامه یتمین هجران خیالیمدن خطور ایلور

اُلوم شاید ویره پایانه بو هجرانی یازهرا

خط رنگین کمان ترسیم اولوب گلبرگ سوری ده

خزان سوزی پوزوب یا حالت ریحانی یازهرا

آخور بی اختیار اشکیم عذاره آتش دلدن

خیال ایتدوقجا جور و کینه ی اعدانی یازهرا

دانیش بیر کلمه بیرده منله خاموش ایت اورک سوزین

مداوا ایله دلده درد بی درمانی یازهرا

نولور بیرده گَله رفتاره بو سرو قد مزون

بُلورسن یوخدی سنسیز بو ایوین سامانی یازهرا

جمالون انکسارین گوز گورور اشکیم اولور جاری

غمام غم توکر گویا بلا بارانی یازهرا

قاپون یاندی، عوالم یاندی، سن یاندون، علی یاندی

دل دشمن دوتا بو آتش سوزانی یازهرا

نه بیر باب کرامت یاندی ظلماً، بلکه یاندوردی

شرار ظلمه دشمن عالم امکانی یازهرا

تسرّی تاپدی یثربدن بو آتش بیت معموره

محاط ایتدی لهیبه مسجد الاقصانی یازهرا

بو درگهدن چکنده شعله نار کینه، یاندوردی

دل رفرف سوار لیله الاسرانی یازهرا

دیمم تنها پیمبر شهری اودلاندی بو آتشدن

دوتوب بو شعله بلکه حائر بطحانی یازهرا

نه قدری پستدور قصد ایلین قصد اهانتله

بو دارُالوحده نی، بو درگه والانی یازهرا

آزوب فطرت یولین بیر طایفه دنیایه تولاندی

نجه بی قدر ایدوبلر گوهر انسانی یازهرا

هوای نفسیدن ایله اولوبلار مست لایَعقل

که تشویره سالوبلار باده و مینانی یازهرا

بلی سرمست دنیا سختدور هشیار اولا بیرده

تاپا عقلین چتین بو باده نین سکرانی یازهرا

ریاست اشتیاقیله ولایت مامنی اندی

مجاب ایتدی جهالت منطق و برهانی یازهرا

اَلیم ظلمیله باغلاندی ولیکن قویمادیم هرگز

تعصّب پاره ایتسون عروه الوثقانی یازهرا

نگاه لطفیوه عابد امیدین باغلیوب دلدن

اودور تکرار ایدر صدقیله یازهرانی یازهرا

تمامی حقوق این سایت متعلق به هیئت زتجیر زنان محله نوبر تبریز می باشد.

WordPress SEO fine-tune by Meta SEO Pack from Poradnik Webmastera
بالای سایت