شما اینجا هستید:صفحه اصلی » اشعار » شعری در مورد خطبه ی حضرت زهرا (س) در مسجد از مرحوم آقای سیّد حسین کهنمویی متخلّص به ریاضی

شعری در مورد خطبه ی حضرت زهرا (س) در مسجد از مرحوم آقای سیّد حسین کهنمویی متخلّص به ریاضی

hazrate-fateme-(www.Alvershop.com)-(28)

خطبه سینده ویردی خلقه درس عبرت فاطمه

ایلدی ظالم لره اتمام حجّت فاطمه

ایتدیلر گوردی خلافت امرینه القاءِ شک

حقّ تعیین ایلین عادل خلیفه قالدی تک

چوخ بویوک توهین اولور اسلامه موضوع فدک

ایستمز هرگز یتیشسون دینه علّت فاطمه

گوردی حقّین مرکزینده اولموری اجرای حق

حقّین اوستون اُتدولر لازم اولور افشای حق

اهل باطلدن اودور ایلردی استیفای حق

ویرمیه تا اهل جور و ظلمه فرصت فاطمه

ایتدی فرمایش بولون ای مصطفی امّتلری

دوشسه رونقدن متاع دین تاپولماز مشتری

ایلر اعمالوز سیزون، دینسیزلری دینه جری

ایستوری دینیندن ایتسون رفع تهمت فاطمه

دین تاپار اقطار دنیایه بو یردن انتشار

بولسه لر بوردا علی حقّین الیندن آلدیلار

خلق اولار اسلامه بدبین دینیدن ایلر فرار

ایستمور خاموش اولا نور شریعت فاطمه

سیز دگلدوز یوخسا دائم ایلین جنگ و ستیز

سیز دگلدوز هر گون آیا طعمه ی شمشیر تیز

دین اسلامی بابام گتدی سیزی ایتدی عزیز

نه مروّتدور گوره سیزدن اذیّت فاطمه

سیز دگلدوز خُم چولونده حقّه اقرار ایلین

سیز دگلدوز یاعلی بَخٍّ لَکَ بَخٍّ دین

سیز دگولسوز اوزگه نی ایمدی خلیفه سسلین

بو ایکی ضدّ نقیضه ایستور علّت فاطمه

سیز دگلدوز گرم اولان موقعده امر کارزار

آرخاسیز قویدوز آتامی ایلدوز بیربیر فرار

شیر نک امّا دایندی شیر حیّ کردگار

ایتمسون آیا نجه کشف حقیقت فاطمه

عهدی سیندیرماق سیزون اوز نفسوزون اغواسیدور

خُم بیاناتی آتامین نکته ی حسّاسیدور

هر کیمه اولا بِنَفسم من، علی مولاسیدور

آشکارا امریدن ایلور حکایت فاطمه

ایلمز انکار حق هر کس حقیقی بنده دور

ایتدوقوز اعمالیدن حقّ اهلی چوخ شرمنده دور

دست حقّی باغلاماق آیا گورون زیبنده دور

حق اوزی ممتاز ایدوب، ویرمور مزیّت فاطمه

باغلیوب بازوی حقّی دست ظلمی آچمیسوز

جنگ دشمندن قاچان گون دین حقدن قاچمیسوز

بیرق عدلی یاتیردوب ظلمه پرچم آچمیسوز

سعی ایدور مسدود ایده ابواب ذلّت فاطمه

پرده ده قالماز حقیقت، کشف اولار بیر گون یقین

محو اولار بدعت قویانلار پیشرفت ایتدوقجا دین

سیز بابامین جانشینون ایتمیون خانه نشین

گورمسون بوندان زیاده هتک حرمت فاطمه

اوز آتام گوردوز منه ویردی فدک املاکینی

دانمیون حقّی، او گونده ایتمیسوز ادراکینی

ایتمون آزرده رسول ا… روح پاکینی

آلمیون مُلکین، گوره ضیق معیشت فاطمه

هر قدر حق سوز دیدی ردّ ایتدیلر دشمنلری

حقّینی غصب ایلینلر اولدولار حقدن بری

آرتدی دردی گون به گون، اولدی مریضه بستری

تا بو دنیای دنیدن ایتدی رحلت فاطمه

جان ویرن ساعت وصیّت ایلدی بو طرزیله

او عم اوغلی غسلیمی ویر آغلا بو خونین دله

نعشینی قوی نصف شبده قبره، گیزلین دفن ایله

بولمسونلر هاردا دفن اولدی بو امّت فاطمه

بو جماعت اوزلری ظلمینده حیران قالدیلار

ووردولار زهرانی، اوز مُلکین الیندن آلدیلار

تا در و دیوار آراسیندا فشاره سالدیلار

سینه زحمیندن اُلونجه چکدی زحمت فاطمه

ای عم اوغلی من قسم ویرّم خداونده سنی

گر سنی ناراحت ایتسم سن حلال ایله منی

نعشین اوستونده اوجالسون قویما زهرا شیونی

آغلاسا زینب گورر روحاً مصیبت فاطمه

اود ووروب امّت قاپوم یاندی منیم شورا گونی

زینبینده اودلانار خرگاهی عاشورا گونی

چوخ چتین گوندور او گونده عترت طاها گونی

توکمسون رخسار زرده اشک حسرت فاطمه

کهنمویی گیتمه تقوا شاهراهیندن کنار

توشه اخذ ایت محشره دنیایه یوخدی اعتبار

عرض ایله ایسته ویره توفیق حیّ کردگار

ایلیوم اوغلون حسینه منده خدمت فاطمه

درباره نویسنده

خادم حضرت علی اصغر (ع)

تعداد مطالب : 25

نظر بدهید

تمامی حقوق این سایت متعلق به هیئت زتجیر زنان محله نوبر تبریز می باشد.

WordPress SEO fine-tune by Meta SEO Pack from Poradnik Webmastera
بالای سایت