شما اینجا هستید:صفحه اصلی » آرشيو عكس » علی لای لای بالام لای لای (صراف تبریزی)

علی لای لای بالام لای لای (صراف تبریزی)

علی لای لای  بالام لای لای (صراف تبریزی)

علی لای لای  بالام لای لای

دولان قانیله قونداقی

علی لای لای ،بالام لای لای

قیزاردان قانی توپراقی

علی لای لای ،بالام لای لای

 

گلستانون گولی سولسون

پوزولسون پایمال اولسون

بالا سنسیز رباب ئولسون

علی لای لای ،بالام لای لای

 

الیمدن کیم سنی آلدی

بئله توپراقلارا سالدی

آنا یاخشی ملر قالدی

علی لای لای ،بالام لای لای

 

آنا دهرون بلاسیندن

دؤنرمیش ئوز بلاسیندن

من آیریلدیم بالا سندن

علی لای لای ،بالام لای لای

 

ایشیقلی أولدوزوم آتدون
منی،توپراقیده یاتدون
نه تئز چیخدون،نه تئز باتدون
علی لای لای ،بالام لای لای
آنان بو حالت زارون
گؤروب اولدی گرفتارون
دی گل بوش قالدی گهوارون
علی لای لای ،بالام لای لای

سنی بی حال ائدن اوخدور
یانان بو حالده چوخدور
ولی لای لای دئین یوخدور
علی لای لای ،بالام لای لای

کؤنول دردینله سرخوشدور
قوجاقیمده یئرون بوشدور
ئوزوم لا ی لای دئیم،خوش دور
علی لای لای ،بالام لای لای

مگر دشمن امان وئردی
سنه رحمین نشان وئردی
گؤروب سود یوخدی قان وئردی
علی لای لای ،بالام لای لای

علی سنسیز سنی آندیم
سمندر تک اودا یاندیم
سئسیمه سس وئر،اودلاندیم
علی لای لای ،بالام لای لای

شیل اولسون قاتلون آخر
خزان ائتدی گولون آخر
نولوب شیرین دیلون آخر؟
علی لای لای ،بالام لای لای

اویان درد و بلان آللام
دورنجا سن اویاخ قاللام
کشیکچون من ئوزوم اوللام
علی لای لای ،بالام لای لای

دور ای شمع شبستانیم
بهار و باغ و بستانیم
سودیلن دولدی پستانیم
علی لای لای ،بالام لای لای

بو صرّاف سیه نامه
یئتیردی شعرین اتمامه
گینه باشدان یازار خامه
علی لای لای ،بالام لای لای

صرّاف تبریزی

 

درباره نویسنده

تعداد مطالب : 32

تمامی حقوق این سایت متعلق به هیئت زتجیر زنان محله نوبر تبریز می باشد.

WordPress SEO fine-tune by Meta SEO Pack from Poradnik Webmastera
بالای سایت